உரிமம் என்றால் சுகம்

கட்டிட உரிமம் கோரும் விண்ணப்பப்படிவம்:

இருக்கிறது

கையெழுத்து உட்பட பூர்த்தி செய்யப்பட்டு

கிரையப்பத்திரம்:

இருக்கவேயிருக்கிறது

உங்கள் மேஜையில் என் பெயரில்

அங்கீகரிக்கப்பட்ட

மனைப்பிரிவு வரைபடம்:

உள்ளது இணைக்கப்பட்டே

விதிகளை கருத்தில் கொண்டு

வரையப்பட்ட கட்டிட வரைபடம்:

நூறு சதம் சாதகமானது என்பது தெரிந்தும்

உங்களின்

நெடுநாளைய ஆய்வில் இருப்பதில்லையா அது

கட்டிட அனுமதிக்கட்டணம்

கட்டிட இடிபாடுகள் அகற்றும் கட்டணம்

கட்டிட தொழிலாளர் நலநிதி

உள்ளூர் திட்டக்குழும அபிவிருத்திக்கட்டணம்

பாதாள சாக்கடை வைப்புத்தொகை:

செலுத்திய சீட்டும் உண்டென்வசம்

கணக்கு எண்ணே காணாததையும்

சேர்த்திட

கவனமாய்த்தான் எடுத்தேன்

இங்கே வைத்து வேண்டாமென்று

கேட்டுக்கொண்ட போது

உங்களின்

முகத்தில் தெரிந்த பதற்றம்

போலீஸ்காரன் கண்காணிப்பிலிருக்கிற

விபச்சாரியினுடையது போலவே இருந்தது

உயர்திரு

நகரமைப்பு அதிகாரி அவர்களே.